So hüt gots los! No alles fertig pake d Wohnig bzw. s Zimmer nochli ufrume und den chömät au scho d Eltere mich go hole. Wie plant pünktlich fahret mir ab richtig Flughafe Züri. Döt acho ab zum Check in 2 warte und bange wiä viel Kilo z viel Gepäck wird i ha. Schlussentlich sinds den 5.6 Kilo also 28.6 Kilo Gepäck. Guet zahlmer halt e Buess für diä paar Kilo. Den no gmüätlich s letschde mol no eis go trinke. 1 Stund vor abflug d verabschidig für 4.5 Mönät und ab durch‘s Drehchrüz richtig Duty Free Store, Sicherheitskontrole und hindere zum Gate E. Döt acho sinds Scho am Borde gsi, das nenntmer „Timeing“. Also gad istige in Flüger vo Air Canada und los gots. De flug isch recht ruhig verlaufe mit chline Turbulenze notürlich wärädem Esse.
Noch 8.5h in Toronto acho mol en halbe Kilometer laufe und am Polizist bi de Passkontrole schnell verzapft was i in Canada wöt mache und das i notürli nur erlaubts debie han. Ab zur Gepäckusgob und durch de Zolle für nüt z deklariärä. Uf de andere Site häd scho de Airoport Driver mit mim Name ufem Schild gwartet.
Mit im bini eimol quer durch Toronto i dä rush houer gfahre. Wunderbari 31°C hets dusse, z, Glück gits hüt Klimaalag bi de Auto. Wäräd dä Fahrt s erstmol de CN Tower gse und de Lake Ontario.
Bi dä 8 Four Oaks Gate in Toronto acho wartet au scho d Maria Salazar vorne uf de chline Terasse vom typische amy Hüsli.
Am Obig nochem esse hät sie mir no churz d Busshaltestel zeiget und den hets scho bald gheisse ab is Bett.

Am Samstig und Sunntig bini mol achli god d Stadt aluege. Zersch mol uf de Buss und luege wie alles fuktioniert do in Canada. Noch ca. 15min warte isch den au mol en Bus cho und i bin igstige. Bi de Donaldstation bini umgstige uf d Subway und mit dem mol bis zu St. George gfahre. Da isch die Haltestell woni für id Schuel au immer muen use. Vo döt us bini mol dur de Queenspark glofe richtig See. Hmm da isch immer witer und witer worde. Den han i de CN Tower gse und han denkt i chönt jo döt mol verbie luege. Zum glück isch gad es Blue Jays Game gsi und i hang wüsst das s Basseball Stadion gad näbäd dra isch! Also eifach de lüt mit dä Shirts nolaufe. Döt acho bini nochli am See entlang richtig Yongestreet. Zum Glück bini achli z wiet gloffe und i han per zuefal gad s „wichtigst“ i dere Stadt gsichtet. Uf zmol taucht en Schrifftzug AIR CANADA CENTRE uf. S dihei vo de Toronto Maple Leafs (NHL), Toronto Marliens (AHL) und de Toronto Raptors (NBA). Den bini richtig Yongestreet zum Eaton Centre. I seg nur de Traum vo jedere Frau. Inne bini ersch am dritte Tag will döt hets ufzmol andersch agfange Regne. Aber bimene Shopping Centre wo ca. 500m lang isch hetmer es wiili bismer gse het was für lädä das dinä hät. Im gägäsatz zunere Frau hani nöd i jede Lade inne müesse. Am Samstig isch vorem Eaton Center no es Hip Hop, Breakdance und Graffitti Festival gsi mit Musig und Showilage. Was i notürlich am erste komplette Tag in Toronto au no han müese go sueche isch d Hockey Hall of Fame und i han sie au gfunde. Aber au döt hani mit inego no gwartet, schliesslich chunt de Ivo no uf Toronto und dä wöt sicher au no go luege!

So di erst Schuelwuche isch verbie. Und i han mi schochli in Altag inägläbt. Und weis was wie funktioniert. Nur mit em Bus hani nochli es Problem. I han 3 Subway Statione zur uswahl und überal fahret anderi Büs richtig mim Wohnort. Leider hani am Weekend e schlechteri Verbindig z Nacht als under dä Wuche. Aber irgendwie findet mer amigs scho hei. :) D Schuel isch relative locker ufbaut. Am Morge mehrheitlich Theorie und am nomitag listening und Wortschas.
Am Sunntig bini den mol an Strand go luege wies isch! I mue sege es isch fast besser als in Spanie oder Italie. Me hät nocher nöd überall Salz uf de Hut. So i wünsch eu e super Wuche i de Schwiz. I werd nögst Weekend sehrworschindlich wieder Schribe. Solang i in Toronto bin is halt achli spärlicher nocher bim reise gits den meh zverzellä! :) Greez

I de Schuell isch nüt speziells passiert. Am Do hämmer Prüäfige gha. Und am Obig hätmer chönä ufes Boot mit inner und Party. Vo döt sind au d Nachtbilder vo dä Stadt. Am Fritig isch vo vielnä dä letschd Obig gsi, us dem grund simmer am Fritig nochli use und hend eis zämä trunke. Am Sa bini bimene Koleg gsi zum Grille. Im gsamte simmer acht lüt us 5 verschidene Natione. Mexiko, Japan, Spanie, Türkei und notürli us dä Schwiz. Am Sunntig bini mit zwei Kollegine no an schönste Strand vo Toronto de Woodbine Beach.

Lek Zit got so schnell fürschi! Jetz bini scho 3 Wuche in Toronto. Innere Wuche chunt scho de Ivo und s Reise got los. Leider got demit au e hammer Zit in Toronto verbie. Die Wuche bini viel Züg go aluege. Do mir am Mäntig nur am Morge Schuel gha hend bini am Nomitag uf de CN Tower ufe. Am Di hemmer Willkommensparty gha vo dä neue Schüeler, am Zistig Hall of Fame fom Hockey nocher no in Usgang und am Fritig Casa Loma. Das isch es Schloss in Toronto mit 97 Zimmer. Das Weekend heist VELD MUSIC FESTIVAL. Und am Mäntig isch en Fiertig do in Canada also gömmer an Strand!

So jetz isches scho verbie! Letschd Wuchenend bini am Veld Festival gsi! Isch super gsi nur dä Deadmau5 hed achli verseit! Er isch jo ursprünglich vo Toronto und hed us dem Grund Heimvorteil gha! Aber all andere Acts woni ghört han sind supper gsi! Am Mäntig bini wie planet an Strand mit de Schuelkolege und Koleginne. Am Di hani den wieder müäse id Schuel! Es isch mega schnell gange und es isch schowider Fritig gsi. Will e Kolegin vo de Schwiz hei het müese simmer no alli zämä ines Koreanischs Restaurant go Zmittagesse. Es isch mega fein gsi. Morn gang i den de Ivo vom Flughafe go abhole und den gömmer is Hotel. I de nögstä Täg gömmer viel sache go aluege! So Wie Hockey Hall of Fame, CN Tower, Toronto Island, Niagarafalls und notürli no en Tag an Strand! Am Mittwoch gömmer no is Momentos und döt gsehni den viel Kolege vo do sehrworschindlich s letschmol. Defür started am Do üse Trip dur Canada.

Am Samstig de 11.08.2012 isch de Ivo uf Toronto cho. Am Sa simmer no go z Nachtesse und den no churz eis go trinke. Am Sunntig simmer easy achli d Stadt go aluege und per zuefall ä halb Stund vorem Baseballspiel New York Yankees vs Toronto Blue Jays voräm Stadion gsi. Mir hend üs spontan entschide zum de Match go luege. Aber es isch so gsi wienis erwarted han! Relative langwilig. Zum Glück hämmer no e Intressants Spiel verwütschd und es isch ä bitz öpis gloffe. Toronto het. 10-7 gwunne.

Am Mäntig de 13.08.2012 simmer zu de Niagarafäll! Zum glück hemmer schöns Wetter verwütschd gha. Es isch schono idrücklich diä Wassermasse wo do durab chömät. Aber halt e riese Touristeattraktion.

Am Di 14.08.2012 simmer am obig no zume Koleg go Rösti mache! Dasmer voräm Reise nomol öbis recht schwizerisches überchömäd!

Am Mittwoch isch de letschdi Tag gsi in Toronto. Mir sind am Morgen no id Hall of Fame und am Nomitag uf Toronto Island. Super schöni Insle mit erholigsfaktor. Aber ihr chönds jo gse uf dä föteli. Am Obig simmer den no mit jehnste Kolege vo dä Schuel in Usgang und hend no eis mitenand trunke.

Am Donnstig 16.08.2012 simmer am Morge mit em Taxi vo Toronto uf Boltom usegfahre und hend döt üses Wohnmobiel in epfang gno. Den hets zersch mol gheisse ab go Esse poste und los gots. Vo Boltom simmer via Barrie, Orillia, Midland, Glen Orchard zum Horseshoe Lake Campground. Döt hemmer serst mol übernachted.

Am Fritig 17.08.2012 Simmer relative früäh ufbroche und hend ca. 600km gmacht. Mir sind vom Horseshoelake via Sudbury, Blind River, Sault Ste. Marie bis zu Frater gfahre. Leider häts am Morge nochli gregnet und mir hend üs den entschide dasmer relative wiet fahred. Damitmer am schluss no zit hend für Vancouver Island. Es het megaschöni Landschafte und Seeä gha und zum Obig ane isch es den glich no schön worde und mir hend d Sunne am Strand chönä gnüsse.

Am Samstig 18.08.2012 Simmer achli spöter losgfahre nocheme feine Zmorge (Nesquik). Denn simmer los richtig Thunder Bay. Mir sind via Wawa, White Lake, Nipigon, Dorion zum Wolfs River. Amene schöne Bach zue hemmer bi schönstem canadischem Wetter üse z Nacht griliert und gesse.  A dem Obig simmer no vo usgwanderete Belgier agsproche Worde und hend en luschdige Obig gha.

Am Sunntig 19.08.2012 Hemmer serstemol d Zitzone gwechslet und sind über 15km am stuck gradus gfahre. Jetz hemmer 7h differenz zur Schwiz. Mir sind vo Wolfs River los richtig Winnipeg, via Thunder Bay, Upsala, English River, Dryden ( geburtsort vom Chris Pronger (NHL Spieler)) noch Kenora. Döt hemmer üses Wohnmobil für einacht heregstellt feini Spagetthi kochet und schöne Wetter gnosse.

Am Mäntig de 20.08.2012 simmer vo Kenora via Winnipeg noch Langruth gfahre. Churz vor Winnipeg hemmer en neue Rekord im gradusfahre gmacht. Mir sind über 40km ohni ei Kurve gfahre. In Langruth hämmer nochämä Campground am Lake Manitoba gfroged. Mir sind nur usglached worde. Aber mir chönged 1.6km nördlich eifach 95N Stross nä und 6 Meile östlich fahre. Dunne hegis den en Platz wommer chönd übernachte. Das hemmer den au gmacht. S resultat gsehnde i de Bilder.

Am Zistig simmer den retur uf therti Strosse und Quer durch Manitoba gfahre. Mir hend gmerkt wiä gross, dass das Land isch und wiä wenig Lüt das do wohned. Mir sind Kilometer wis gradus gfahre und meistens mit wenig bis kei Vercher. Churz vor Regina hämmer den in White City en Campground gfunde und festgstellt das mir wieder ä Stund guet gmacht hend.

Am Mittwoch 22.08.2012 simmer vo White City via Regina, Swift Current, Maple Creek, Dunmore noch Brooks gfahre und hend am Obig uf de Geburtstag vom Ivo agstosse. Uf dere Strecki is mehrheitlich gradus gange. Smeiste wommer gmesse hend sind über 50km gradus gsi. Am Obig simmer ufeme Chline schönä Campground gsi wo üs en Iheimische Holz und e Axt zuverfüägig gstellt het. Jetz hemmer sicher gnueg Holz für de Rest vo dä Reis.

Am Dunnstig 23.08.2012 simmer vo Brooks via Calgary noch Canmore gfahre. In Calgary hemmer en halt igleit und sind notürli churz go dä Saddledome aluege (Hockeystadion).

Am Fritig 24.08.2012 simmer vo Canmore noch Banff. Da isch nöd wiet gsi vo dä Kilometerazahl her. Also simmer serste mol inen National Park. Mir hend de Tag hauptsächlich in Banff verbrocht und sind id Hot Springs go bade, notürlich nöd mitem Auto ufegfahre sondern glofe.
Am Obig simmer is Städtli go znachtesse. Mir sind im Restaurant Ticino glanded und hend feini Spätzli becho! Nochem esse simmer no churz äs Bierli go trinke und den bi chalte Temperature übernachted hend.

Am Samstig 25.08.2012 simmer vo Banff via Lake Louise bis ca. Kicking Horse Pass gfahre. Kummrecht s Touriste Ort Lake Louise verloh, gsehmer es Auto am rand sto. Also mol ahalte und luege was döt het. Kumrecht i de Wildniss scho präsentiert sich i super sichtwiiti en Schwarz Bär. Leider hets immer meh Lüt ge und die hend den agfange usstige und sich bis uf 3m an Bär here go. Mir sind den mit äs paar guete Föteli witer gfahre.
I de nöchi vom Kicking Horse Pass hämmer fast einsam ufeme Campground üsi Zeltufgschlage. Mir sind relative früäh scho döt gsi. Also hemmer üs entschide mir packet üses züg und hocket mit Musig und öbis Zrinke an Fluss abe. Bi schönstem Wetter hemmer de Nomitag gnosse.

Am Sunntig 26.08.2012 simmer vom Kicking Horse Pass bis fast uf Jasper gfahre. Nochere chalte Nacht simmer los gfahre und churz drufabe hend sich üs wiblichi und jungi Bighorn Sheeps (Grosshornschoof) präsentiert. Churz vor Jasper hemmer üs entschide zum de Camper herestellä und d Sunne noch z gnüsse.

siehe unten

Am Mäntig 27.08.2012 simmer vo Jasper via Pocahontas bis zum Mt. Robson gfahre. Am Morge simmer noch Jasper go de Chüelschrank füllä und den witer noch Pocahontas und döt is 17km de Berg deruf zu Hot Springs. Innere Wunderschönä Bergkullise hemmer s 38Grad warme Wasser gnosse. Nocheme Mittagesse im Camper simmer losgfahre. Mir hend wieder zrug noch Jasper müese. Noch Jasper simmer bis zum Mt. Robsen gfahre und hend döt gägäüber ufem Campground übernachted.

Am Zistig 28.08.2012 simmer vom Mt. Robsen bis noch Prince George gfahre. Mir hend zum vorussichtlich letschde mol e Stund gwunne und sind in Prince George mol üsi Wösch go wesche. Wils agfange hed regne hemmer üs entschide zum im MC Donalds üsi Natels und de Laptop z lade und nochli is Inet zgo. Churz nochem instaliere vo allne Stromkabel simmer agsproche worde vomene Iheimische. Er he düs dä Tipp ge, dasmer bim Casino Hotel ufem Parkplatz chan gratis Übernachte. Da hemmer gnutzt und sind nochem Nachtesse no äs canadisches Bier go trinke.

Am Mittwoch simmer vo Prince George bis zum Ten Mile Lake gfahre und hend döt amene schönä See und Campgrounde übernachted. Leider het s Wetter nöd ganz mitgspielt zum no go Bade, obwohl s Wasser sehr warm gsi wär. Mir sind den nochli go Wandere und hend no e Ühle atroffe.

Am Donnstig 30.08.2012 simmer vom Ten Mile Lake noch Barkerville gfahre und hend döt e historischs Goldgräberstädli besichtigt.

Am Fritig 31.08.2012 simmer vo Ten Mile Lake über Quesnel Williams Lake noch Lac la Hache gfahre. Leider het s Wetter nöd so mit gspielt und mir sind go esse poste und hend de Akku vom Laptop und de Natel wiedermol glade. Am Obig simmer no amene schöne See bim Suneuntergang go laufe.

Am Samstig 01.09.2012 simmer vo Lac la Hache noch Lillooet gfahre. D Strecki richtit Whistler isch wunderschön zum fahre gsi und zum glück het s Wetter au nochli mitgspielt. Mir hend de Nomitag bi schönnstem canadischem Wetter am Fraser River gnosse.

Am Sunntig 02.09.2012 simmer vo Lillooet via Pemberton noch Whistler gfahre. In Whistler hemmer zersch mol s schöne aber voll überloffene Städli aglueged und sind begeistered gsi vo dä schönä canadische Schiegebiet. Im Summer hets sehr viel Mountenbiker wo Downhill streckene benuzed. Mir hend üs entschide zum do z übernachte und sind losgfahre umm i dä nöchi en Campground z finde. Leider isch dä wo am nöchste gsi isch scho usbueched gsi, will Canada en nationale Fiirtig gha hed. Den hemmer üs gseit mir schlofed halt under dä Schanze vom Simon Ammann, sind also zrug uf Whistler und hend de Obig bimene feine Bier usklinge lo. Am zeni losgfahre richtig Ammannschanze, rechts vo de Stross abboge und ca. 10km s Loch deruf. Leider hets nöd ganz zu de Schanze glanged, will sie das Areal absperred. Mir hend üs für en Platz unterhalb vo de Schanze entschide und hend hald i de Wildniss übernachted.

Am Mäntig 03.09.2012 simmer früä ufgstande und wieder uf Whistler gfahre. Nochämä feine Zmorgä Kaffi i de Talstation, simmer mol dä Högger deruf gloffe. Mir hend üs e schöns Plätzli i de Wise gsuecht und hend d Usicht uf Whistler und die umligende Berge gnosse. Am früähne Nomitag simmer den Losgfahre richtig Vancouver. Dä schön Highway Sea to Sky Highway Nr.99 hed üs immer wieder schöni Fotimotive gä. Churz vor Horseshoe Bay hemmer üs entschide zum übernachte. Mir hend no es paar 2-3 Stund chönä d Sunne gnüsse am Meer une.

Am Zistig 04.09.2012 simmer a dä Horseshoe Bay ufs Schiff richtitig Nanaimo und vo döt richtig norde bis Qualicum Bay uf Vancouver Island. Fürs Mittagesse hemmer üs en Rastplatz gsuecht. Mir sind amene Wunderschönä See namens Spider Lake glandet. Mir hend so schön gfunde döt und s Wetter het passt, dasmer üs entschide hend zum de Nomitag do zblibe und am Obig i de nöche ien Campgrounde zueche. Mir hend den am Obig eine direkt am Meer gfunde.

Am Mittwoch hemmer zersch wöllä witer richtig norde noch Port Hardy fahre. Mir hend üs aber unterwegs den entschide das vo de Zit her z knapp wird und mir umchered und Tofino vorziend.

Noch dem dasmer kehrt hend, simmer dä 19er Highway abegfahre bismer uf de 4er hend chönä wechsle und sind witergfahre bsi Port Alberni und hend döt ufämä familiere Campground de Obig verbrocht.

Am Dunnstig 06.09.2012 simmer vo Port Alberni noch Tofino gfahre zum go Wahlewatching mache. Mir sind nochere mega schönä fahrt über Päss und enge strosse, wiemer sich das sus in Canada nöd gwohnt isch, heil acho. In Tofino het üs schönste Wetter erwarted und mir sind i eis vo vielne Wahlewatching Center go e Adventuretour bueche. Mir hend bi därä Tour Orcas, Buckelwahl, Seeleue und Shünd gse. Am obig simmer wieder uf Port Alberni zrug wil alli Campgrounds usbueched gsi sind.

Am Fritig 07.09.2012 hemmer üs entschide zum usschlofe und sind aschlüssend an Spider Lake gfahre wommer am erste Tag uf Vancouver Islande gfunde hend. Mir hend döt s schöne Wetter gnosse und sind achli go schwimme.

Am Samstig 08.09.2012 simmer ufbroche richtig Victoria und hend de Nomitag in Sidney verbrocht. Am Obig simmer den no bis uf Sooke ganz im süde vo de Insle gfahre.

Am Sunntig 09.09.2012 simmer uf Victoria gfahre und hend de schön Hafe und d Stadt Victoria (d Hauptstadt vo BC) mit de Parlamentsgebäude besichtigt.

Am Mäntig 10.09.2012 simmer uf Sidney gfahre. Vo döt us simmer den am Zistig uf d Fähre und uf Vancouver. Am Nomitag hemmer no sache Online erledigt wommer no hend müese mache. Am obig hemmer imene eifache aber schönä Campground übernachted.

Am Zistig 11.09.2012 simmer mit de Fähre vo Sidney uf Vancouver und hend döt üses Motorhome beserein gmacht und s züg noch 4 Wuche wieder id Koffer verpackt. Mir hend es älters schwizer Pärli wieder troffe wommer in Jasper ufem Campground känäglernt hend. Mit enä hämmer am Nommitag no s schöne Wetter bimene Bier gnosse.

Am Mittwoch 12.09.2012 hemmer üses Motorhome wieder zrug brocht und sind is Motel St. Clair in Downtown Vancouver. Am Nommitag hemmer nochli s schöne Wetter in Vancouver am Meer gnosse.

Vom Dunnstig 13.09.2012 bis Samstig 15.09.2012 hemmer Vancouver aglueged. Mir sind in Stanley Park und hend s wunderschöne Wetter bi ca. 25 Grad gnosse. Am Fritig simmer mit de Maria, minere (Roger) Grosstante go Znachtesse und hend bi erä no en Gin Tonic trunke. Am Samstig simmer uf Granville Island und am Obig hämmer no d'BC Lions (American Football) im TV vervolgt.

Am Sunntig 16.09.2012 hämmer noch über 9 bzw. 5 Wuche Canada verloh und sind mit de legändäre Greyhoundbus inere 4.5h fahrt noch Seattle gfahre.

Am Mäntig und Zistig simmer go Seattle aluege. Mir sind dur d Stadt gloffe und hend de Markt, s erste Starbuckskafi, Football und Baseballstadion, Sowie d Promenade am Meer entlang besichtiget.

Am Mittwoch 19.09.2012 simmer vo Seattle via Olympia, Hoquiam noch Astoria gfahre. Däbie hemmer glueged dasmer möglichst schnell a die Wunderschön Küste cho sind.

Am Dunnstig 20.09.2012 simmer vo Astoria bis Lincoln City gfahre. Mir hend mehreri halt a Outletstores gmacht und sind üs mit neue Chleider go Ideke. Leider hed do s Wetter nöd ganz mitgspielt und mir hend dä ganz Tag Nebel gha.

Am Fritig 21.09.2012 simmer vo Lincoln City alles de Küste entlang noch Bandon gfahre und hend nochämä Neblige Start in Tag de wunderschön Sunneuntergang gnosse.Befor mir aber de Sunneuntergang gnosse hend simmer mit Quats über grossie Dühne gfahre.

Am Samstig 02.09.2012 simmer bi wunderschönem Wetter vo Bandon noch Eureka gfahre. Mir hend churz vor Californie nomol s Taxfreie Poste gnuzt und sind den i di grösser Stadt Eureka cho wommer de obig no gnosse hend.

Am Sunntig 23.09.2012 hemmer wöllä en Football Sunntig mache und früäh e Motel finde dasmer den innere Bar chönd Football luege. Leider isch die rechnig nöd ufgange, do mir nördlich vor San Francisco kei Motel me gfunde hend. Somit simmer bis uf San Francisco inä gfahre. Über die Weltbekanti Golden Gate Bridge gfahre und scho z mittzt in San Francisco. S Witzige dra isch, i bin über d Brugg gfahre, würkli gseh han ich sie aber nöd. Es het leider viel z viel Nebel gha.

I de volgende Täg simmer die verschiedene Sehenswürdigkeite go aluege. Leider isch Alcatraz für die nögstä täg us buechet gsi und s Glück mitem Wetter het üs au verloh! mir hend am 24. no äs Föteli vo dä Golden Gate Bridge chönä mache. Leider het sie sich nocher immer im Nebel versteckt. Wils am Morge und obig recht Neblig und chalt gsi isch, hemmer üs entschide zum uf Reno z fahre und döt s schöne und warme Wetter z gnüsse.

Am Mittwoch 26.09.2012 simmer vo San Francisco uf Reno gfahre. Mir sind nöd direkt uf Reno gfahre, sondern hend no en abstecher an Lake Tahoe gmacht. Reno isch s chline Las Vegas vo de USA und es isch würkli so! Es het mereri bekanti Casinos wommer vo Las Vegas kennt. Mir hend döt kei Geld verspielt und hend am Pool s schöne und Warme Wetter gnosse.

Am Zistig 28.09.2012 simmer vo Reno bis uf Bishop gfahre.

Am Samstig 29.09.2012 simmer vo Bishop via Death Valley bis uf Las Vegas gfahre. Mir hend zersch vor Las Vegas nomol wöllä übernachte, mir hend den aber gmerkt dasmer meh fürs Zimmer zahlet weder wemmer in Las Vegas no es Motel nämät. Mir hend den imene Motel übernachtet befor mir s vorreservierte Hooterszimmer bezoge hend.
Mir sind bis am Fritig 05.10.2012 in Vegas blibe und hend bi strahlendem Sunneschie und 35 Grad de Tag verbrocht. Go spiele simmer nonig, das gömmer den ersch wenn de Savi chunt.

Am Fritig 05.10.2012 simmer vo Las Vegas via Los Angeles noch Santa Clarita gfahre. Das lieht nördlich vo LA.